عشان خاطري
عشان الحلم مش حلمي…بلاش ترمي
حمول الكون علي كتافي…ده انا حافي
وشايل هم فوق همي
وليه شايفاني متعافي…وانا اضعف من النسمة
يدوب اخري باقول…كلمة…!!
يدوب بتحامي في زعيقي…نشف ريقي
من التهويل من التبرير من التكسير
من النومة ع دمعة…من القومة ع دمعة
ده حتي اجازتي يوم جمعة…بتيجي عليا بالتكدير
بخاف اسرح …لتبقي التهمة بالنية
وانا لا حول ولا ليا
انا عايش مع العايشيين….بنتفرج علي العايشيين
بنتمني…مجرد يعني امنية…!!
عشان خاطري
بلاش تعصري وتكوي…بلاش تلوي كده دراعي
…تعضي بأسوة ف صباعي
لا انا (يوسف) ولا (لاوي)
ولا عندي عصا (موسي)…ولا حاوي
انا عنوان علي الهامش…ف كشكولك
ومني ساعات بيشكولك
عشان بصرخ…وصوتي نشاذ وبيزعج
انا محبوس في افلامهم..في برامجهم
في اغنية يغنوها…ومستني السميع (يفرج)
وعارف انهم عايشين..وعارف ان انا منسي
وعارف اني بشكي لطوب…ويمكن شكوتي تحرج…!!
عشان خاطري
يا بلادي
ليست هناك تعليقات:
إرسال تعليق